Talisman brisé - conte
D. Esalé
Artículo
#Cursos bilingües de francés

ÑANNDE SAHARAA OO WILITOYTA

Heɗito henndu ndun, ko Saharaa on woni e woyde. Himo fadii neɗɗo nunɗuɗo, moƴƴuɗo, ballitoowo mo wiltude kadi.

Heɗito henndu ndun, ko Saharaa on woni e woyde… Himo yiɗi wiltude.

Saharaa on wonaa jeereende wonnoo : o woniino leydi labaandi, kecciri.

Yimɓe hoɗunooɓe ton ɓen no teddinnoo tagoodi ndin, hiɓe wuuri nguurndam mbelɗam.

Hiɓe mbaañatnoo, hiɓe aynatnoo, hiɓe ndematnoo.

Hiɓe yiɗi leydi maɓɓe ndin, leydi maɓɓe ndin no yiɗi ɓe.

Yimɓe wudduɓe ngari koɗi : bone naati.

Ɓeen yimɓe yiɗaa jam, ko ngalu tan ɓe njiɗi.

Hay huunde yonataa ɓe, ɓe jokki e ɓeydugol ngaluuji maɓɓe tan.

Ka waaño, ɓe mbarat kulle — naa ko ɓe ñaama, kono ko ko ɓe mantora.

Ɓe soppi ladde nden — tawi wonaa ko ɓe ɗuwora toɓo maa naange, ko ko ɓe mahira kuɓeeje laamu.

Ko ɓeen yimɓe wudduɓe mbaɗatnoo barmini Saharaa oo.

O felliti wontude jeereende.

Kono yimɓe hoɗunooɓe ton ɓen eggaani, sabu hiɓe yiɗi leydi ndin.

Ɗum weli Saharaa on. Fii yettugol ɓe fii giggol maɓɓe ngol, Saharaa on rokki ɓe ɓulli, rokki ɓe kadi daande maayo Niiseer ngoo.

Gila ndeen, Saharaa on no weemi.

Heɗito henndu ndun, ko Saharaa on woni e woyde. Himo yiɗi wiltude.

Ñannde goo, Saharaa on lamndii mawɗo ganndo : « Honno mi yiitirta ndeen jonnde jam jamaanuuji feƴƴuɗi ? »

Ganndo on jaabii : « Wondu e yimɓe nunɗuɓe, moƴƴuɓe, teddinɓe tagoodi ndin. »

Ganndo on ɓeydi : « Ñannde goo neɗɗo aroyat. O wuurnita huɗo kon e leɗɗe anndanooɗe e ɗiin jamaanuuji feƴƴuɗi. Ko o neɗɗo nunɗuɗo, moƴƴuɗo. O waɗa nguurndam makko fof e puɗi ɗin. Kono haa aljanna majjunooɗo on heɓtoo, ko maa oon neɗɗo foola, yimɓe wudduɓe ɓen. Ɗum saɗtat haa ɓurta.

Kono woodat jeyaaɗo moƴƴuɗo balloyoo mo dartaade caɗeele ɗen haa o foola añɓe makko ɓen. Oon neɗɗo no jogii aawdi mbaawndi wallude ma haa wilitaa kadi. »

Heɗito henndu ndun, ko Saharaa on woni e woyde. Himo fadii neɗɗo nunɗuɗo, moƴƴuɗo, ballitoowo mo wiltude kadi. 

No teddinirɗen tagudi ndin woo, ko noon njiɗirten ndi, ko noon jeereende nden yaawirta wiltude.

Publicado el 08/07/2022 - Modificado el 08/07/2022

RFI SAVOIRS n'est pas responsable des contenus provenant de sites internet externes

Fréquentation certifiée par l'OJDOJD Dénombrement des médias